Heb 5 | WSK | STEP | Priest supuling nunga bala se aratomonko mu iwita: Kaem mu kariimet nunga ningi kari bo priest supuling ko bagurukko balu beteso. Se nu kariimet nunga nongoma tata kari baga se, kariimet nunga ikup memek te siwura ko Kaem tama tuso. Ale munan duap duap Kaem tuso.

Hebrews 5

Priest supuling nunga ura

1 Priest supuling nunga bala se aratomonko mu iwita: Kaem mu kariimet nunga ningi kari bo priest supuling ko bagurukko balu beteso. Se nu kariimet nunga nongoma tata kari baga se, kariimet nunga ikup memek te siwura ko Kaem tama tuso. Ale munan duap duap Kaem tuso. 2 Nu kari sang lage ninguru me ko ikia, lage supawasan, mu gomang lila ago nunga sinar taukko terong mam. Mu awuk, nu kari tala, se sokel mena. 3 Umutang ko, nu kota ko memek ko Kaem tama tuso, ale kariimet suen la nunga memek ago la ko Kaem tama tuso.

4 Priest supuling ko ura mu ura nup karogo. Se kari bo kota ko ikia te priest supuling ko me aratoso. Mena. Mu Kaem ko aira te la, Kaem girakala Aaron priest supuling ko aratukko balam butatala. ^{▼▼Heb 5:3-4 Priest nunga munan: Lev 9:7; Exo 28:1.} 5 Se Kristus betela kota ko ikia te priest supuling ko me aratam. Mena. Mu Kaem iwita nu maonam:

“Ni aitak aninga Kuriang.
Se aitak ani nika Niet.” ^{▼▼Heb 5:5-6 Psalm 2:7; 110:4. Melchizedek: Gen 14:18-20; Heb 7:1, 16-17.}
6 Ale batoga bo te agotala balam:

“Ni Melchizedek iwita tom suen biya ko priest bagerko.”
7 Tom Jesus ali imi te bagakaso mu nu nia se, mononge biyala te Kaem aru ngatangarukaso, Kaem umutang sokel ago, nu sanguk se noko kuera mu te barasukko terong mam. Nu Kaem kuring bowa ningi la bagakaso, se umutang te Kaem noko ngatangara mu ko kuring iluwam. ^{▼▼Heb 5:7-8 Jesus Kaem aru ngatangarukaso: Luke 22:42-44. Nu kota numi ira kutuwuram: Phil 2:8.} 8 Nu Kaem ko Kuriang. Bare nu ikup yaman gikaso mu te nu kuring kaora ko munan ninguru ikiam. 9 Ale te Sangaru Ta Kari nunguning ko aratam. Se arikaya nu kuring karo tusan, mu nuna te tom suen biya yawarakala bagomonko. 10 Mu Kaem kota noko balam, nu Melchizedek iwita, Priest Supuling.

Ana kuriang gotektek iwita me baganakko

11 Ana mel mu ko den am bo ago ko balnakko, bare ninga ikia ikup biya, se tairatela ko ikialko me terong. Se ana ko ninga manornakko mu ura kowar. 12 Nina ulengkala biya den gilalong yawara ikiman. Se aitak tom imi te mu nina kausa kari ko bagaralko. Bare mena. Nina kuriang am amin nowara iwita, nengeta inang aora nalko me terong iwita. ^{▼▼Heb 5:12-14 Hebrew alo mu kuriang amin nowara iwita: 1 Cor 3:1-3. Ikia sinar: Rom 16:19.} Se kari saki Kaem ko den guyak wetang te mu aking ninga manarmon mu asele ko agila. 13 E awiriya amin naso, mu nu am kuriang gotek bagoso, se munan aguwaya ningo se aguwaya memek mu nu me ikiso. Bare kariimet garuk mu asele inang aora namonko. Mu awuk, nuna nongota nononga ikia mungkala ura tuman, ale munan ningo se memek mu te tuteman ale ko ninguru sinar aman.

14